Ana Martínez
ñació en Barcelona, en 1981. Trabaya como enfermera nel serviciu d’Urxencies
nel Hospital Clínic de la mesma ciudá. Ye coordinadora, xunto con Montse
Vergara, del llibru acabante publizase “Como comercian con tu salud” (Icària,
2014), nel que se recueye’l trabayu de la primer fase del proyeutu“Privatizando la sanidá. Impautu na salú de la privatización de la sanidá enCatalunya” fechu n’andecha con una bayura de
coleutivos embarcaos na investigación, esbilla y denuncia del complexu procesu
de privatización de la sanidá publica catalana, tapecía embaxo una fola
desarticuladora que pretende invisibilizar les consecuencies y los mecanismos
que la rixen. Salúdanos cola so sorrisa indeleble na puerta del so centru de
trabayu, llugar d’encuentru tamién pa una tarde dominical, desde onde mos lleva
a una terraza non mui llonxe. Tres una güeyada desconfiable a la grabadora,
entama col so discursu viviegu.
LMS. ¿Defíneste como enfermera o
investigadora en salú?
Nin un nin
l’otru convénceme. Agora mesmu soi activista pola defensa de la sanidá pública.
Ye como si fóranos la vida n’ello (rises).
LMS. ¿En qué momentu te arreyasti a la llucha pola sanidá pública?
Les
tisoriáes escontra la salú entamaron con fuercia xusto enantes de qu’españara’l
15M en 2011. Pa lo cabero de 2010, col aporte de CiU al poder y l’aire
austericida que truxo consigo, muncha xente, ente ellos abondos trabayadores de
la salú, llevantóse escontra les midíes implementáes pel “conseller” Boi Ruiz.
Camiento qu’en xeneral nun hai bona alcordanza de la cronoloxía. Si-y preguntes
a dalguien pela cai diráte que tola protesta masiva dióse tres el 15M, pero lo
ciertu ye que les que tuvimos implicáes nes primeres lluches, recordámoslo como
un fenómenu de mases que ñació abondo antes del 15 de mayu. Por exemplu,
“Indignáos pelos retayos en sanidá” (ñacíu de los” compas” del Hospital del
Mar) yéremos orixinalmente cuatro gatos (asindicales ya horizontales) que mos
comunicábamos al traviés de Facebook ya organizábamos movilizaciones escontra los
retayos en sanidá. Conocimos a Democracia Real Yá nos compases previos al 15M,
tamién a delles compañeres de la PAH, que llevaba más de cuatro años en pies de
guerra. Darréu, el llevantamientu popular desendolcáu dende’l 15 de mayu
pasónos per enriba ya integrámos n’elli. A vegáes camieto qu’entonces esmució
dalgo bien fondo, que movilizó a ciudadanes y trabayadores d’un mou que nun
tornaremos a ver en Catalunya.
LMS. ¿Cómo ñació’l llibru
“Cómo comercian con tu salud?”
El
llibru xéstase na indignación, ñaz na academia y fíxose n’andecha con dellos
actores: investigadores, activistes, plataformes, entidáes… Desplícome: ye’l
reflexu d’un berru, el de les plataformes en llucha pola sanidá, los
movimientos sociales, les asociaciones de pacientes ya usuarios, canalizáu al
traviés del Grupu d’Investigación en Desigualdáes en Salú (GREDS-EMCONET), con
Joan Benach y Gemma Tarafa a la cabeza, enfrente la necesidá de faer un
esfuerciu d’analís énte un fenómenu tan difícil d’aprehender como ye la
privatización de la sanidá catalana.
Asina
que decidióse llevar a cabu una recoyía pública de dineru (lo qu’agora nómase
“crowdfunding”), al traviés d’un blogue ya un verkami, pa entamar el proyeutu
en cuatro fases de les que’l llibru ye namás la primera. Montse Vergara y yo animámonos
a coordinalo. Demientres la so ellaboración, el documentu cuntó cola andecha de
les persones, plataformes, entidáes, en defensa de la sanidá pública, que lu
revisaron, apurrieron les sos notes, cámbeos, y dieren el visto bonu. Foi un
trabayu con munchu “feedback”.
LMS. ¿En qué consisten
cauna de les fases del proyeutu?
Dexáime
primero aclariar una cosa: la necesidá del proyeutu nun yera guiar l’actividá
de los movimientos sociales. Tratábase d’algamar unos pegoyos teóricos sólidos,
de carganos d’argumentos pa defender lo que ye un drechu. En Catalunya, la
información ye escaso, los datos fonon tapecíos tolo posible dende l’entamu.
Con más rixu nos caberos cinco años. Tovía anguañu sigui siendo un problema
bien relevante, al que l’alministración actual dá-y la espalda enforma
interesadamente. Por aciu d’eso la primer parte del proyeutu consistió en faer
un barríu de datos inicial, descubriendo los vacíos esistentes y averándonos a
cuál podría ser la investigación dempués. Esta primer fase respuende a dos
entrugues principales: en primer llugar, identificar los elementos de
privatización y mercantilización del sistema catalán. En segundu llugar,
averanos a cómo eses midíes d’austeridá (entendíes tamién como elementos de
privatización y mercantilización del sistema) puen tener impactáo nel sistema
de salú y na salú de la población, tratando d’esbillar nidiamente- lo cual nun
ye cenciellu- ente austeridá y privatización. La siguiente fase, en marcha
actualmente, ye redactar un informe con un cálter más reflexivu, ampliáu, y
propositivu de lo que xeneró la primer fase.
LMS. Nel llibru ponéis
munchu enfotu na necesidá de d’estremar nidiamnete ente mercantilización y
privatización. ¿Por qué?
AM.
Ye importante estremar dambos conceutos pa conocer el sistema sanitariu catalán
y poder identificar los mecanismos de la xénesis, tresformación ya agora desaniciu
de la so vertiente pública. La privatización, más cenciella de definir magar de
nun tar llibre de controversies, ye la tresferencia de recursos de la esfera
pública a la privada, nes estremaes estayes que tien el sistema: xestión,
provisión, direición, formación, etc. Mientes que la esencia de la
mercantilización nun radica na titularidá de los recursos, sinon que ye la
introducción d’elementos de mercáu nel sistema públicu. Los “elementos de
mercáu” abarquen dende la conceutualización qu’afeuta al discurso de la salú
como un producto y non un drechu, hasta la llei, que la privatiza de facto. L’exemplu paradigmáticu son
los entes públicos, empreses y consorcios públicos, de titularidá pública,
financiación variable y xestión cada vegada más amestada… na actualidá
catalana, en procesu de privatización radical. Too ello inducío polos cantares
de serena de los partidarios d’ESADE & cia, voceros neolliberales, que nun
paren d’inifiñir, ensin fundamentu, en que la sanidá pública ye insostenible, na necesidá d’implementar mecanismos pa aumentar la eficiencia, etc. Lo cual entra de
llenu, de nuevu, na ideoloxía que propicia los procesos de mercantilización. Recubiertu
de tecnicismos ya faches d’oxetividá, ta l’interés puru y duru de convertir la
salú nuna mercancía más, la sanidá nun negociu. Los procesos de privatización
impliquen privatización o implícanlo de forma parcial. Anque a min préstame más
dicir que la mercantilización ye l’antoxana de la privatización.
LMS. Por suerte, pues,
¿qué queda güei ensin mercantilizar?
AM.
Asina ye…
LMS. ¿Ye l’Hospital Clínic un exemplu d’esto?
AM.
Ye’l paradigma del Modelu Catalán. N’él dánse los dos fenómenos con una
intensidá brutal y, hasta agora, una falta de consciencia esmolecedora per
parte de los trabayadores ya usuarios. Y nun sorprende, pues tres años ya años
de privatización tapecía y propaganda (mercantilización), na que millones
d’euros colaron pel sumidoriu, pieslláronse más d’un 20% de les cames,
derívanse milentes de pacientes al ámbitu priváu (Hospital Sagrat Cor, Hospital
Plató, Hospital General de Catalunya, toos d’IDCSalut, enantes Capio, cuyu
actual direutor d’innovación foi l’anterior direutor xeneral del Clínic), la
sida de l’austerida tá usándose como ariete xustificador del porgüeyu soterráu
(o non tan soterráu). En cuantes a la cooptación de los trabayadores pela élite
dirixente, en plena danza centrípeta, como correspuende a toa puerta xiratoria,
especialmente nel casu de los mélicos, el comité de delegáos, únicu sindicatu
esistente pa la plantilla mélica y del que se pasa a formar parte
automáticamente cola firma del contratu, tién xugáo un papel perimportante
esmoleciendo a los pocos que s’atrevieren a poner en dulda el modelu o les
midíes deriváes del mesmu. En cuantes a enfermería, agora creóse un comité
específicu pa nós, polo que munches de les mios compañeres callen y suañen con
xubir, como faen los mélicos, pela escalada que va de la precarización al
estrellatu monocorde. Ensin cuntar col restu de categorías profesionales. Ye
más, pisándolos si ye necesariu, pa defender “lo de nueso” como categoría. Ye
bien intelixente per parte de la empresa: divide y vencerás.
LMS. ¿Por qué creyes que
anguaño, escontra de lo que pasaba hai malpenes unos años, en centros públicos,
hospitales o la universidá hai tanto miéu per parte de los trabayadores a
expresar el descontentu? ¿Por qué se fae tan difícil crear redes de solidaridá
y aición coletiva nestos llugares?
AM.
Nun hay una razón sola, pero’l motivu más importante agora mesmo, pamidea, ye’l
miéu. La situación anguañu, produz en toos y toes miéu a perder el trabayu,
incluso naquellos que tienen la suerte de nun engrosar la segunda llista más
importante de xóvenes en edá llaboral depués de los paráos: los hiperpreparáos
precarios. Pero siempres hai xente bravo: nel Clínic, por exemplu, cuando
ficimos la primer acampada, munches y munchos de los qu’ellí táben yeren
suplentes.
Na
Universidá, pémique el factor miéu se ve polo menos equiparáu pol
individualismu autorreferencial inducíu pela hexemonía académica actual, que
fuercia a dexar de pensar y actuar coleutivamente pa enzarrase a escribir papers y pidir beques a entidáes priváes.
Un profesor politizáu nun tá bien vistu, nin bien entendíu, como si los que fáense
los “lliberales neutros” nun tuvieren un xeitu político. De la mesma, quixere
añedir qu’el desamparu a que se ven condergaos los trabayadores nel ámbito
priváu ye muncho pior, pero nun se fala dello porque nun interesa. De momento,
hai que desacreditar tolo públicu, y afalagar lo priváu.
LMS: ¿Cuál ye’l papel
que xugaron los sindicatos en too esto?
AM.
La crisis política manifiéstase tamién nel mundiu sindical, de manera triste y
perversa. Ye una crítica qu’hai una vegada que tá dirixéndose haza ellos, pero
hai entá más años (tantos como tien el bipartidismu) que les cúpules sindicales
fain oyíos sordos. Los sindicatos de clas fonon parte del problema, y otros,
más activos y radicales, nun supieron ximielgar o movilizar a la xente.
Afayábanse demasiao na so posición. El problema ye tremendu, porque más alló de
la so inutilidá actual, nun paez que vayan a reñacer de les sos cenices anque
tuvieren voluntá y capacidá de reactivase y reconstituise. El so sectarismu,
siguidismu, entreguismu, cainismu, depende, de toos moos, del centru de trabayu
del que falemos. Hai exemplos recientes de los que sintinos arguyosos. Ensin
embargu, la desconfianza que xeneren, por mui inducida que seya en parte por
determináos sectores de la clas política ya empresarial, ta en términos
xenerales, xustificao. Por eso, creyo que nel desbordamientu transitoriu del
sistema que simbolizó’l 15M yera clave escaecer les banderes. La xente taba
bien cabreada, tamién colos sindicatos, que por aición o por omisión, teníen
parte de la culpa.
Un
exemplu d’esto ye’l comité d’empresa del Hospital Clínic: cuando dende’l grupu
de Tancada Clínic díbemos a los conceyos reclamando’l nuesu drechu a participar,
dicíennos lliteralmente: “preséntaivos y que vos voten; entós podréis falar”.
Lo mesmo que mos dicíen nel Parlament,
lo mesmo que mos dicen dende’l gobiernu. Reproducen les mesmes formes viciaes
ya antidemocrátiques d’eso a lo que llamen sistema de representación. En fin, medrana
y mediocridá, como en tantos otros sitios.
LMS. Nun mesmu orde de coses: ¿y l’academia? ¿Xuega toa ella un papel llexitimador de les propuestes neolliberales o hai focos críticos?
El
pensamientu críticu, por desgracia, pasó de ser un de los leitmotivs de la universidá a un motivu de vergoña ente la castra
académica. Creyo que Joan Benach ya’l so grupu de trabayu furrulen d’una manera
bastante exceicional na Universitat Pompeu i Fabra, onde tamién trabaya Vicenç
Navarro, percríticu tamién cola austeridá en xeneral y na salú en concretu.
Poques puertes más alló de los sos despachos, tan los economistes, aquellos
d’Andreu Mas Colell, tránsfuga del comunismo al costumbrismu, encabezáu el corredor
por un cuadru de Milto Friedman: ye un insultu diariu.
LMS. ¿Crees que les
cátedres de salú pública y preventiva de les facultáes de Medicina opusiéronse
en xeneral a los retayos?
AM.
Non. Yo creyo que, en cierto mou, Benach xuega con fueu. La sensación que tengo
ye que la xente que ta más comprometío nun pue caltener unos principios mui
radicales dende l’academia. Vicenç Navaro podría ser un exemplu: en términos
políticos asítiase siempres na socialdemocracia, y anque tien claro qu’hai que
frenar l’austeridá, non defende postulaos radicales.
LMS. Dicíes más arriba, y nun ye la primer vegada que lo sentimos, que’l coleutivu médicu ta rescaláu de clasismu. Salvu honroses exceiciones, como asocedió na marea Blanca de Madrid, los mélicos nun suelen implicase en llucha dalguna, sacantes que seya puramente gremial. Probablemente esto seya por mor de dos fenómenos esencialmente: el papel de clérigu paternalista que se-y tien atribuyíu al mélico hestóricamente, col mensaxe implícitu de que como tou confesor, nun debe tener carauterístiques distintives más allá del acentu o la marca del reló y, per otru llau, la carrera pola reconocencia y/o pergüeyu, enllena sacrificios, chanchullos, xestes, competencia irracional, velees, llevantos y otres tantes cares que degolen lo éticu, pero que en nengún llau inclúin la politización esplícita (como si lo de Piqué, Boi Ruiz, Lasquetti, Belenes, etc nun fuere políticu…) y en casique tolos casos conlleven un falsu sentimiento de pertencia a la clas dominante (va poco Yanis Varoufakis decía que ye una de les tentaciones más habituales y más difíciles de resistir: el discretu encantu de la burguesía). ¿Podría extrapolase al coleutivo de enfermeros y enfermeres?
AM.
Menos en términos cuantitativos, pero cualitativamente te diría que’l mecanismu
ta incorporándose nun grau mayor inclusive qu’ente los médicos. Yo veo nes mios
compañeres el deséu irrefrenable d’aportar a la mesma posición que l’estamentu
medicu. Esto ye: asitiate siempres percima del restu de trabayadores.
LMS. ¿Funciona como un sistema de clases?
AM.
Sí. Asina ye. Y enfermería sedría la supuesta clas media, que saca’l pañuelu
palestín escontra los médicos y les caceroles pa estremase de los “negros de
baxo” (compañeros y compañeres de llimpieza, camilleros, seguridá,
alministración, etc). Ello ye que’l sistema de promoción profesional non yá ye
xerárquicu, sinon que ye nidiamente clasista. Enfermería tién un perbon sistema
de promoción. Ensin embargu, al restu d’estamentos se-yos dió la migaya. Caún
nel so sitiu, anque’l raseru esbarie o s’avere, más o menos, según quién avere
la mano. Güeyando al coleutivo médicu, estremamonos por medrana, estremámonos
por envidies, dixebrámonos de les que realmente son les nueses.
LMS. ¿Creyes que ye aplicable una llectura de clas a la evolución de la salú pública? ¿Creyes que si, a diferencia de lo que se tien dicho los caberos cuarenta años, la transición foi una derrota de los trabayadores y non una victoria, tamos metíos hasta’l pescuezu na llamarga d’aquellos polvos?
AM.
Asina paez que rescampla. Ye una estratexa pa tener controlada a la sociedá, pa
apurrir más alló inda la “sociedá de los dos tercios” propuesta por Thatcher.
Llevamos decenios encontiando una mentira, cola invención d’una supuesta clas
media dixebrada de la clas trabayadora, dando por supuesta la “ahestoricidá”
del sistema, lo perenne de los drechos, etc, que toos queríamos esguilar
cómodamente, por muncho que seya un oxímoron. A la fin acabes pensando que’l
opresor ye’l modelu a siguir.
LMS. ¿Esa clas media que vióse desprovista de la base económica que permitía’l so mou de vida, que se sentía identificada col modelu de crecimientu, accederá a entrar en mutues priváes o aceutar la privatización?
AM.
Espero que non, a lo menos otres munches persones y yo trabayamos pa torgalo.
Agora hai más xente espierto, consciente, que cuando entamamos va cuatro años, que
yera glayar en castañéu. Sicasí, que nun
teamos en castañéu nun quier dicir que teamos apregonando delantre les mases,
usamos llingua de signos pa sordomodos en metá de la selva de pantalles y
altavoces que repiten el mantra oficial ensin parar… lluchar escontra eso nun
sedrá cosa de dos díes. Ensin embargu, pongo en dulda que la xente nun
reaicione pase lo que pase. Cualesquier se da cuenta que lo tán atendiendo
pior, o de que yá nun-y atienden, o que-y cobren pela consulta o que-y faen dir
a rehabilitación lloñe de casa.
LMS. Pero va haber una
parte de la xente que, ensin formar parte de la élite social, podrá permitise
pagar una mutua, y fadrálo pensando que ye lo que-y convién, anque hasta agora
tenga acudío siempres a la sanidá pública.
AM.
“Pue permitíselo” nun ye una realidá oxetiva, ye un cambéu de prioridaes
inducío peles necesidáes, que na mesma respuenden al discursu hexemónicu. Nun
sé si vistis la televisión catalana a lo cabero, pero les anuncies de mutues y
servicios privaos multiplicáronse d’una forma insultante. Hasta cuando punxeron
el documental Ciutat morta, la primer anuncia que punxeron, ante una audiencia
teóricamente crítica pero en tou casu bien amplia, foi d’una mutua de seguros.
Pero insisto: hai una parte de la clas media que sí que ta viéndose desprovista
de too, incluyía la cobertoria sanitario y a estazón. Asina espertaron.
Pastilla colorada o pastilla colorada, nin eleición a lo Matrix nin lleches.
L’exemplu de la PAH ye perfechu pa desplicalo.
LMS. ¿Qué son los determinantes sociales de la salú?
AM. Nun soi esperta en determinantes de salú.
Encamiéntovos a lleer cualquier trabayu de Joan Benach. En tou casu, en resume
podríemos dicir que na nuesa salú nun inflúi solo’l sistema sanitariu, tamién
son fundamentales la vivienda, les condiciones d’emplegu, l’entornu familiar ya
educativu, el nivel socioeconómicu, el xéneru, etc. Hai qu’estremar la salú de
la sanidá. Hasta agora, colos retayos nos hospitales y nos centros d’atención
primaria, tábemos refiriéndonos a la sanidá, pero la salú engloba munchos otros
factores. Los probes non solo muerren más, sinon qu’amás muerren pior. Nun ye
casual que nes zones más probes haiga más hipertensos, más diabéticos… non
porque coman menos, sinon porque comen pior, porque tienen que priorizar la so
hipoteca o nun tienen tiempo pa cuidar de la salú. Tienen menos perceición de
la salú, menor conciencia de salú. Hai exemplos bien averáos a nos y cenciellos,
a la vegada qu’enforma tarrecibles: La esperanza de vida d’un vecín de
Pedralbes ye casi diez años mayor que la de ún de Nou Barris. A los grandonos
popes de la medicina moderna y a los adalides de la “modernización del sistema”
que tanto esbabayen que namái tienen en cunta les propuestes basáes na
evidencia, equí tienen evidencia. Lo que-yos falta ye, a lo meyor, “videncia”.
Faigo
un paréntesis pa poner un exemplu: cuando se llantaron les Entidáes de Base
Asociativa en Barcelona (que permitieron a médicos inversores axudicase centros
de salú pertenecientes a la rede pública), foi de casualidá nos barrios más
ricos, onde se llevó a cabu con rixu. Ello pon de manifiestu onde teníen más
oportunidáes de negociu estes entidáes con ánimo de pergüeyu. El 33% de los
pacientes de les EBAS tienen doble cobertoria, escontra’l 8% del restu de CAPs.
Les EBAS tan asitiáes, principalmente en zones estratéxiques. ¿Ónde van poder
ser más eficientes, esto ye, faer meyor negociu? Nuna fastera de ricos, con
doble cobertura…. pales caxigalines van a la privada.
Munchos
cuerren a concluyir: entós que los ricos se paguen la sanidá y que pal restu
seya pública. Equivócanse. Primero por una cuestión d’equidá y, segundo, porque
al “pijo” presta-y evitase les llestes d’espera y tener un cuartu individual
con vistes a la mar, pero si tien qu’escoyer ente eso y nun morrer d’una
enfermedá grave, nun va duldar y dirá pa la pública. En resume: toos podemos
venos enantes o depués, afectaos pol retayu y privatización de la sanidá pública.
LMS. ¿Creyes que ye consecuencia de que’l modelu ye mui asistencialista, con poca énfasis nes midíes enfocáes a la medicina privada?
AM.
Agora quexámonos d’eso, nun ficimos educación sanitaria, nin programes
d’educación, endelgazóse l’atención primaria en llugar de guarnila y la
prevención relluma pola so ausencia. Ye parte de la estratexa neolliberal.
Ensin programes d’educación en salú y prevención tornes a la población en más
dependiente del sistema sanitariu. Depués, ya pues culpabilizala y responsabilizala.
Amás, con un sistema preventivista la industria farmacéutica dexaría de ganar
munches perres. Tornamos a la población en dependientes pa poder pedí-yos que
se corresponsabilicen, sobremanera económicamente, resalvando dafechamente los
determinantes sociales y acusándolos d’abusonos que demanden de bones a
primeres. Quexámonos del sistema. Pues ye’l mesmu sistema que provocó esta
situación.
LMS. Agora que dices
qu’a vegáes los ricos tamién escueyen la sanidá pública: esti mesmu mes, el Parlament
pidió una investigación fondera de l’actividá de Barnaclínic, la fastera
privada del hospital Clínic. El desencadenante foi una demanda de la patronal
de centros priváos sanitarios, qu’acusaben a Barnaclínic de competencia
deslleal.
AM.
Sí, ye enforma paradóxico, que quien llevante la lliebre seya la propia
patronal. Sobremanera si tenemos en cunta que’l conceller de Sanitat de güei,
Boi Ruiz, foi munchos años direutor y depués presidente de la Unió Catalana d’Hospitals, principal lobby de la patronal privada. Nun ye la
primer vegada que se pon a Barnaclinic en tela de xuiciu. L’informe de la
sindicatura de cuentes de 2012 reveló una delda perimportante haza l’hospital,
cuando la xustificación que tienen en boca los sos defensores a toes hores ye
que l’actividá privada, non yá nun implica un conflictu éticu, anque se dea nes
mesmes instalaciones, colos mesmos recursos y por parte de los mesmos profesionales,
sinon qu’ayuda a faer menos deficitaria l’asistencia pública porque los
beneficios reverten na actividá pública del hospital. Anque’l director d’agora
el Dr. Josep Maria Piqué, tienlo repetío hasta l’enfastiu en delles charres pa aselar
a los trabayadores, nun amosó un solu datu convincente qu’esplique por casu los
sueldos de los principales dirixentes de Barnaclinic y los sos venceyos cola
xunta de patronatu del hospital. En tou casu la investigación a Barnaclinic y
la so aparición nos medios supunxo un verdaderu palu al exemplu paradigmatcu de
privatización tapada que caracteuriza al modelu
sanitariu catalán d’anguaño. Nel intrin tan sacando a concursu la compra
per parte de capitales privaos de veinti centros d’atención primaria, anguaño
operáronse más de 17000 pacientes procedentes de la sanidá pública en centro de
IDCSalud qu’en 2013 facturó 127 millones d’euros a la Generalitat, y suma y
sigui. CiU col sofitu por omisión de ERC, ta en plena carrera por completar el
so modelu enantes de les próximes eleiciones.
LMS.¿Podríes resumir en
qué consiste la estratexa de CiU?
AM.
Ye al empar bien cenciello y bien complicáu. Cenciellu porque na esencia lo que
se quier ye sacar tayada dalgo que ye un drechu universal, poro de baldre, pero
al empar complexu porque nun ye una ramascada que-yos dio agora. Nun ye que, de
sópitu, cuatro allumaos de dreches esconsoñaren y cutiérense la frente
alcordándose de los donuts escaecíos na encimera de les sos casones, non:
lleven intentándolo más de treinta años, pero hasta ahora la “correlación de
debilidáes” namá-yos dexó faelo de forma sibilina, disimulada, tapada por rebuscaos
alcuerdos y bilordios llegales. L'oxetivu ye doble: destruyir lo público, non por
preste si non por interés, parasitalo, estrumilo, y convertir la salú nuna
mercancía cola que poder faer negociu. Les estratexes van por fases, la primera
ye estrozar lo público recortando, endelgazando'l presupuestu coles razones más
pelegrines, precarizando’l trabayu, robando la dignidá, fundiendo la calidá.
Dempués va haber que vender en tolos foros y de toles maneres posibles que lo
privao ye más eficiente (y llimpio, y educao, y güel meyor, y hai más famosos).
Ye una guerra de propaganda na que l'enemigu tien el poder de quitar los fondos
y usalos nel so beneficiu, mientres-yos mina la moral a les tos tropes.
LMS. ¿Cómo? ¿Cómo faen pa metese a los nuesos nel bolsu?
AM.
Responsabilizando o, más bien, acusando, a les persones enfermes de talo.
Tienen que ser conscientes (sic) de los sos propios procesos de salú ya
enfermedá y, poro, entender la necesidá y arimar el costazu pa procurar la
sostenibilidá del sistema. Engañar al ciudadanu faciéndo-y creer que se-y
otorga un papel relevante de decisión ya autonomía, cuando en realidá ta faciendo
dél una mercancía cola que faer negociu. Esta vuelta de tuerca completaráse
cola aplicación del proyectu Visc+, que-y va vender datos clínicos de pacientes
del sistema catalán de salú a empreses aseguradores y farmacéutiques
multinacionales que, analizando esos datos, van poner el preciu que más-yos
convenga a les pólices y fármacos que nos enxaretarán na siguiente fase.
<<Non señor, pa usté la póliza ye’l doblu de cara>>, <<¿Por
qué?>>, <<Porque fumó hasta fai 20 años>>, <<Cómo lo
sabe, si nun se lo dixi?>>, <<Ponlo equí>>.
LMS. ¿Y cómo ye posible cola que ta cayendo que la xente seya tan parao na so respuesta?
AM.
La debilidá de les lluches sanitaries ye un fiel reflexu del modelu sanitario
catalán, bien desagregao y confuso (titularidá pública del ICS con sistemes
mistos, entes de collaboración privada,
les privaes con porgüeyu…). La constitución de la respuesta frente al mesmu nun
partió d'una marea ciudadana tresversal. Nos centros sanitarios, la implicación
de los trabayadores ye bien desigual. En comparanza coles lluches de Madrid,
equí hai hasta agora un crisol estazáu de lluches, na que los ciudadanos y
profesionales coincidieron pocu (el 28 de febrero, dempués desta entrevista)
constituyóse la marea blanca en Catalunya, arrexuntando a toles plataformes y
colectivos en llucha). Ye verdá qu'en Madrid foi tan de sópitu, que la reacción
xenerada foi más compacta y enérxica…
LMS. ¿Cuala ye la finalidá nesti contestu del plan de reordenación territorial y asistencial (RAT)?
Cola
sida de repartir de manera equitativa la baxa/moderada complexidá y l'alta
complexidá ente los centros de tercer nivel de Catalunya, lo que se fixo foi esviar
l'actividá más codalosa (la de baxa complexidá) haza l'ámbitu priváu
(esencialmente IDCSalut), y la d'alta complexidá, muncho más cara, a los
grandes centros públicos. Lo peor ye que la xustificación del plan, nel
contestu del plan estratéxicu de sanidá 2011-15, básase nuna evidencia
contradictoria hasta la cañamina: nel mesmu informe figura que Catalunya taba escepcionalmente bien asitiada nel conxuntu d'Europa
n'aspeutos como'l porcentaxe d'hospitalizaciones, l'usu de fármacos, el
funcionamientu de l'atención primaria, por non falar de la esperanza de vida,
que yera la meyor. Pocos años dempués, ésta cayó estreldosamente, fíxose tou lo
contrario a lo qu'había que faer (fortalecer la primaria y l'educación sanitaria,
ente otres coses), y aplicáronse midíes inxustificables pa unviar cada vegada
más pacientes a la privada mientres se cierren cames na pública. Miles
d'usuarios quedaron ensin especialista, les llistes d'espera aumentaron en
llugar de menguar, y un llargu etcétera de catástrofes y situaciones
demenciales propies d'un país de pandereta. L'oxetivu últimu, como digo, ye la
reorganización de zones de p'arrexuntar árees que se xestionen dende una mesma
unidá, col oxetivu caberu de vender o privatizar estes unidaes.
LMS. ¿Qué hai detrás del copagu?
AM.
Repagu.
LMS. ¿Vamos haza un modelu como l'estadounidense?
AM.
Non exautamente. Siempres digo que ye un terrible erru poner l'exemplu
estadounidense como'l supuestu futuru. Equí ye más sangrín, ye’l negociu
redondu pa los que se tán arriqueciendo: cobertoria universal con
financiamientu públicu (esto ye: tou fíu de vecín ye veceru potencial, sacante
dellos colectivos, como los inmigrantes ensin papeles), pero con un porcentaxe
cada vegada mayor de mercantilización de los servicios. Por casu: un paciente
consulta n'urxencies del Hospital Clínic por una neumonía. Atiéndenlu, y al
cabu de pongamos, 14 hores, derívenlu al Hospital Sagrat Cor de IDCSalut, onde
pasa 48 hores y ye dáu d'alta abondo ceo. El paciente, al llegar a casa,
complícase porque l'alta yera prematura. Probablemente consulte (o l'ambulancia
llevarálu por orde d’enriba) al Clínic o, en casu de que llegue al Sagrat Cor, unviaránlu
al Clínic. Amás, el preciu que IDCSalut cobra acaldía a la Generalitat por
tener al paciente ye casi un 50% más de lo que se-y paga a un centru públicu.
Ye'l negociu perfechu: monopoliu con collaboración pública. Nun tien fallu.
LMS. Según tú, ¿qué papel tendría de xugar l'estáu na xestión de lo público?
AM.
Dos cosines: prefiero falar de “lo común” más que de “lo público”. Esto
postreru ye lo que se xestiona dende les alministraciones, mientres lo común noma
a aquellos bienes que son de toos y deberíemos de poder xestionar ente toos con
participación y democracia directa. En realidá, anque diga esto, nun me considero
una anarquista (en realidá, prefiero nun etiquetame, yes más llibre), pero nun
soi defensora del papel del estáu na xestión de los bienes comunes. Na fase na
que tamos agora, na que se trata de recuperar lo que nos quitaron, lo
prioritariu ye devolver a la esfera pública a lo menos lo que ye común y xestionalo
con tresparencia.
LMS. Nel casu de que los bienes comunes foren alministraos a partir de la intervención más activa de la ciudadanía, ¿nun tendríemos de ser toos muncho más responsables? (eso, siquier, va ser lo primero que t’espete quien sofite’l paradigma antropolóxicu lliberal).
AM.
Nun creyo que me resgara les vestidures pa tratar de convencer a una persona
asina.De toos moos, pa nun allonganos, voi dicir que nun ye lo mesmo
participación qu'alministración, igual que nun ye igual ser responsables que corresponsables.
LMS. Cola Llei Xeneral de Sanidá de 1986, cuando’l primer gobiernu socialista, ¿hebo una intención real de crear una llei sanitaria que buscara que la sanidá fuera realmente común, publica y dempués nun pudo ser? ¿O crees que yera una estratexa dende l'entamu pa xenerar un sistema universal pero misto, y que dempués aportó en daqué cada vegada más privao?
AM.
Esa llei tuvo vixencia real 2 o 3 años, depués surdieron informes Abril y otros
tantos peros a la idea inicial… tuvo bien como puntu partida, pero nun foi más
allá. Creo que si s'intentó en dalgún momentu, la voluntá esmúciose rápido.
LMS. ¿Cuálos son los venceyos ente'l poder político y el poder económico nel procesu de privatización de la sanidá?
AM.
Aclariar esti puntu ye l'oxetivu principal de la mio tesis doctoral. L'exemplu
más claru son les puertes xiratories, como la que comentemos antes del antiguu
director xeneral del Clínic. Encamiéntovos el videu Quién manda na sanidá de
Catalunya de la PARS. Na sanidá
catalana, en llugar de puertes xiratories podríamos falar d'autopistes d'oru.
Antes d'abandonar los sos cargos políticos yá tán en conseyos d'alministración
de grandes empreses del ámbitu de la sanidá. Ye l'exemplu de Josep Prat, Josep Maria
Padrosa (l'anterior y actual directores del sistema catalán de salú,
respeutivamente), Boi Ruiz y una llarga, perllarga llista. Amás, vense
envueltos grandes financieros como Isidre Fainé (“La Caixa”), bufetes
d'abogaos, periodistes y de xacíu, el tercer pegollu del chiringu de la sanidá
privada: el poder mediático. Montamos el modelu y espublizámoslu al traviés de
los medios de mases. ASISA dizlo bien claro nel so eslogan: <<el nuesu
beneficiu ye la to salú>>.
LMS. ¿Paezte que la
participación de grandes empreses catalanes nesti procesu nun foi criticada
duramente cuando salió a la lluz porque les mesmes contribuyeron a xenerar la
imaxe ad hoc de “nació catalana” que defende Mas y que paez nun anoxar demasiáu
a ERC?
AM.
Ye un fenómenu bien complexu: xenerar una conciencia nacional catalana, na que consiguieron ensertar cola aquiescencia
de la izquierda, la mentalidá neolliberal en casi tolos ámbitos cola escusa de
que <<va ser meyor que tar al serviciu de Madrid anque tengamos una
sanidá privada>>, la cosa marchó, pero coles sos contradicciones. Sicasí,
sí creo que'l soberanismu sirve como cortina de fumu al austericidiu y
mercantilización de la socioverxencia y ERC. Les competencies en sanidá tresfiriéronse
a Catalunya en 1981, y agora viéndennos la moto de que l'amenorgamientu de 1500
millones del presupuestu en sanidá demientres los sos cuatro años de gobiernu
ye culpa de qu'hai maltratu fiscal impuestu pol gobiernu central, que son
antiindependentistes ya antidemocráticos. Nun lo creen nin ellos nin Rajoy, que
s'emprestó encantáu a sigui-yos la farsa.
LMS. Curiosamente nesi
sen, el partíu que más ta faciendo porque s'investigue'l fraude sanitariu son
les CUP.
AM.
Talamente. Nesi aspeutu, nada que reprocha-yos. Siéntome bien allegada a les CUP
nel so programa social. Ello nun quita que tenga la mio opinión sobre la so
conceición nacional y sobre a quién-y tienden la mano nel so enfotu por
priorizala costantemente perriba de too. Prestábame l’eslogan “Independència
per a canviar-ho tot”, pero sigo pensando que llevantar una llende y dicir qu'asina
vas ser llibre, ye un oxímoron que nun entra en prau. La base social ya’l
discursu social que tienen suscríbolos al 100% pero cómo lu pretenden llevar a
cabu y con quién se alíen creyo fai que s'eslea'l so programa y el so sentir
d'izquierdes. En cierto mou, siento que tán priorizando la independencia perriba
de la izquierda. Sicasí, Esquerra Republicana de Catalunya, ye inda peor. Anque
yá sabíamos que nun yeren d'izquierdes de mano. Les CUP, ye verdá, defenden enforma
la clase trabayadora, pónenla del so llau, pero llamentablemente creyo que quien
se lleva “al bolsu” a la clase trabayadora foi'l PSC antes d'aportar a lo que
son agora y Podemos o Podem, na situación d’anguaño. El cinturón coloráu, nun
ye de les CUP, por munchu que s'enfoten. Les CUP nútrense básicamente de los
fíos rabilaos de la burguesía (van lloveme les crítiques por esto):
Universitarios, básicamente, en barrios como Gràcia o Sants, mientres la
currante, la clas obrera real, L’Hospitalet, Cornellà, Nou Barris... ye la de
los Podem y los Guanyem polo xeneral (bonu: el que tien más o menos daqué de
conciencia de clas, porque munchos desentiéndense o voten a la derecha). Nun
esistió independentismu popular como fenómenu de mases; ¡nun hubo obreros independentistes nunca! El noi del sucre nun yera independentista,
nin la CNT, nin el PSUC de la guerra civil, nin el POUM. Els segadors, por muncho que s'enfoten, nun ye un himnu
independentista, ye un clamor popular – catalanista, sí- escontra'l sistema
feudal. Los independentistes yeren los burgueses de Cambó.
LMS. ¿El 15M permitió llexitimase a la izquierda vistiéndose de deséu ciudadanu (falamos de Podemos, claro)?
AM.
Pa min el 15M foi un espertar colectivu, desorganizau y perguapu, que permitió
romper con determinaos anatemes. Nun ye que seya enforma “fan” de Podemos, pero
sí qu'entiendo l'abandonu del discursu derecha-izquierda pol del 99% vs. 1%.
Hai que camudar el discursu de xemes en cuando. El 15M sentó eses bases. Nun ye
lo mesmo lo que defende Podemos, por munchu que s'esforcien n'iriguise como la
cristalización de la indignación nes places, porque ellí glayábamos <<nun
nos representen>> y agora represéntennos ochocientos. Quiciabes más que
recoyer l'espíritu del 15M van electoralizalo. Alcuérdome d'una señora a lo
primero del 15M que dixo <<vós sois los políticos del futuru>>, atalantaba
que nun s'enteraba de nada, pero vaya si tenía razón la señora… llamentablemente.
LMS. Quiciabes tamién la clave ye que pa cada <<nun nos representen>> había un significáu distintu, pa unos yera fartura de la clase política, pa otros de los partíos d'aquel momentu… Y Podemos fue a da-y la vuelta a esi discursu y volvelo puramente contra'l bipartidismu y non tantu contra'l sistema de representación, ¿non?
AM.
Este ye otru de los riesgos que yo-y veo a los nuevos partíos, que nun me presta
tener que llamar partíos: que defechu paez que se conformaron con camudar la
cara o presentase como la pureza delantre del sistema bipartidista corruptu,
que naide puede negar que lo ye. Dame medrana que se produza la segunda
transición española y volvamos a un sistema de representación partidista nel que
damos un cheque en blancu cada cuatro años y nun hai cambéu de conciencia na
participación y nel exerciciu d'un verdaderu sistema democráticu
LMS. Últimamente falóse enforma de la hipótesis del “Comunismu Ninja™” en Podemos, esto ye, que son xente d'izquierda radical que cayeron na cuenta qu'hai qu'utilizar les ferramientes qu’esisten pa llegar al poder y a partir d'ende defender una serie de coses porque nun podrá superase la esfera neolliberal pola correllación actual de fuercies, ¿te paez escabarriáu? ¿Ye algamable? ¿Pue faese una pedagoxía dende enriba pa camudar les coses?
AM.
Creo que lo de pedagoxía dende enriba duel a los oyíos. La pedagoxía faese
dende embaxo. Nun tengo una opinión perfecha sobre esto, porque apúrrenme
mensaxes diverxentes xente bien distinto a la que respeto enforma. Nun tengo
claro qu'haya que aportar a les instituciones pa dinamitar el poder, pero
tampoco que puea faese dende fora. Creo que Podemos ye, nel momentu
d'emerxencia actual, “el mal menor”.
LMS. Pero tu encamentaríes a un ciudadanu d'a pies que se ve afectáu polos retayos…
AM.
...A que vote a Podemos? ¡Sí, ho! ¡Votáilos! ¡toos! Los males menores a nivel
estatal son Podemos y “hasta” IX. O los “Ganemos”
municipales. Nun ye que me convenzan del tou. Lo que yo quedría nun ye un
sistema de representación política, pero “agora” nun voi poneme repunante con
esto. Los “otros” tán matándonos, lliteralmente…
LMS. Pero Podemos constituyóse como una agrupación de xente que se movilizó y activó, ¿non? O a lo menos neso basen la so autoxustificación.
AM.
Yo-y veo, por supuestu, les potencialidaes. Pero fai falta llucha popular y
movilización social más allá de que se vote a Podemos, y pel momento, lo que sé
ye que la movilización social cayó en picáu desque se supon qu'asaltemos “les
instituciones”. Esisten iniciatives más radicales inclusive a nivel de
representatividá nes instituciones burgueses, como la que foi la Demo 4.0, que
reclama la cuota de representación pa caúna de nós.
D'eso, namoré dafechu. Pasarán bien d’años pa que quiciabes podamos ver daqué
similar.
LMS. ¿Pienses que nun ha d'haber nenguna representación a nengún nivel?
AM.
Non, nun creyo eso exautamente. Por eso digo que vivo nuna constante contradicción.
Torno a poner el casu de los bienes comunes. Los asuntos que mos afecten a toes
tendríen de poder decidise ente toes. Yo nun pueo delegar les mios opiniones
ensin condiciones per siempres y pa siempres n'otra persona. Hai coses de importancia
tala que tendríen de ser consultaes siempres. Nun conozo a xeitu’l programa de
Podemos, pero nun sé si a nivel de calidá democrática y de participación -non
solo de cara a la galería- tien una bona posición. Seique seyen les prieses, o
les potenciales “responsabilidaes de gobiernu”. Repito que, agora tamos nuna
situación bien crítica, y la prioridá ye que dexen de matanos. Pos, bien, ma,
güela: votái a Pablo Iglesias. O a Ada Colau en Barcelona.
LMS. ¿Qué perspectiva
ves pa los próximos cinco o diez años? Pon un vector enriba de la mesa.
AM.
Tengo mieu de que si hai un cambéu de gobiernu la xente va movese menos. Puede
haber cambeos polo xeneral si se completa’l tan cacarexáu fin del bipartidismu;
básicamente tocantes a pone-y fin a les midíes d'austeridá, que ye lo más
urxente. De toes formes, el mesmu capitalismu va acabar cola austeridá porque
dempués de tantos años d'acumuladura ensin torgues pue dexase afloxar la lluria
unos años pa siguir con “la so paz social”. Nun sé en qué situación pondrá eso
a Europa, pero'l cambéu más fondu que se precisa nun va ser en diez años.
Esmolezme que dientro de treinta años cayamos na cuenta de que volvemos tar de
nuevu nel iniciu, o a la fin, según se mire, d'una nueva transición democrática
que no fondero tapeza un nuevu ciclu del capital. Perderíemos el tiempu de
nuevu y vamos tener qu'andar otra vegada esi camín. Y la incertidume va tar
ende de nuevu: güei que se puede, ¿pañamos un pocu, o preparamos pa pañalo tou
mañana?
LMS. Qué faemos?
AM.
Nun tengo recetes. Dientro poco, como sigamos asina, naide va tener…
LMS. ¿A qué persona nos encamientes qu'entrevistemos pa pescudar más coses sobre'l procesu de privatización de la sanidá?
AM.
Diríavos munches persones. Les mios maestres, con muncho ciñu: Clara Valverde y
Jesús Blanco.
LMS. ¿Cuálos son los tos mares del sur y qué música o lliteratura te llevaríes?
AM.
El mio nuevu llar nel monte, a casi una hora de la escandalera de Barcelona.
Ellí pondríavos “Lleguen voces”, cantada por Carmen Martín, y daríavos a lleer
“Por qué l'austeridá mata” de David Stuckler y Sanjay Basu.
LMS. Munches gracies, Ana.
AM. ¡A vós!
